De Ö3 Wetterstation Krumbach woa im August wegen technischem Defekt leider zum Teu außer Betrieb. Hiaz is wida ois in da Uadnung. De Statisik is soweit wia meglich ausbessert.
Ö3 Wedastation
A Schneekotz
Manchsmui gibbs scho gschpoasige „Föhla“: am 15. Dezember hot insa Schneepegl auf oamui 24 cm ånzagt, obwui goa koa Schnee glegn is. A Kolleg von da ZAMG is drauf kema, wos da Grund woa: a Kotz!
Mia hobm bei da Wedastation grod an Vergleichstest lafn, und so hängg ausnåhmsweis ara Kamera duat. Na schauts sölbst, wos ma do gsegn hot bei 24 cm Schnee:
Und so hot des in de Originaldatn ausgschaut:
I hob den „Föhla“ hiazt aussa glöscht 😉
Aa auf Ö3 hobms davon bericht: https://oe3.orf.at/stories/3010194/
(c) ZAMG10 Joah „Ö3-Wetterstation Krumbach in der Buckligen Welt“
Åm 24. Nuvemba 2006 is insa Wedastation eingweiht wuan, des san oiso hiaz scho wida 10 Joah!
Vül Regn
Nåch dem stoakn Regn vom 31. Mai föht ins hiaz neama vül auf de Joahres-Regensumman vom letztn Joahr. Des hast – ånders gsogt, dass vo Jänna bis Mai scho fåst so vül gregnt hot wia im gånzn truckanen Joah 2015 zsamm! Der letzte Stand is do zan segn: Statistik (bittschen a poar Sekundn Geduid, weul de Statistik imma neich grechnt wiad).
Grumbocha Fosching
Åm Noandog am Foschingsåmstog woa im Moakt de „Ö3 Wetterstation Krumbach“ zan segn: mit an schen Wedaheisl (in da Mittn), mit Regn (gånz links aus da Wuikn aussa), Sunn, Schnee (bei de zwoa kloan Gschroppn), Blitz (rechts), und in da Mittn, jo des sui I sei (wia aufn kloan Nåmansschüdl auf da Brusttoschn zan lesen woa und am Deteulbüdl rechts zan segn is!). Na des woa a Ibaroschung und Hetz!
Und a sunst woan a gånze Schoa Noan untawegs, sicha weit iba 200! Dazua vü zinftige Musi in de Gscheftn und bei de Wiatn – a rechte Gaudi hoid!
NMS Schula bei da Wedastation
Am Freido vuam easchtn Advent-Sundo hob I oana Gruppn aus da NMS Grumboch wos bei da Ö3 Wedastation erklärt und zoag. De Schula vo da drittn Klass woan vui intaressiert und se hobm a an gånz jungan und engagiertn Lehra, den Rosenkranz Christoph aus Wiesmoth. Hot mi echt gfreit!
Mia redn iban neichn Schneesensor und wiea dea funktioniert, Büdl (c) Christoph Rosenkranz.
Neicha Schneesensor in Betrieb
Seit Dezemba hobma hiaz den neichn Laser-Schneepegel bei da Ö3-Wedastation in Betrieb, und de Werte wean a scho ånzagt auf insara Seitn do! De aktuelle Schneehechn is a bei wetter.orf.at imma zan segn.
Eigenoartiga heiriga Temperaturvalauf
Nuamalerweis mocht bei ins di Temperaturkurvn ibas Joah gsegn hibsch an Bugl. Heia oba iss recht floch. Wånn ma hiazt amoi vo da kurzn Hitz im Juni åsegn, dånn iss vo Miaz bis in Oktoba eini net recht vü untaschiedlich gwen. Schau da des untn å bei da Temperaturgrafik vo Jänna bis 13. Oktoba! Wie kummt des? Des kummt vo dem, dass zeascht im Fruahjoah vül z’woam woa, dann im Juli und bsundas im August z’koid, und hiaz im Oktoba iss wida z’woam.
Easchta Bodnfrost
Heit hot’s in easchtn Reif gebn in da Buckladn Wöd. Do und duat hot ma’s auf da Wisn und auf de Dachln scho weiß gsegn. Bei da Ö3 Wedastation is ois Bodnminimum -0,4 Grad gmessn woan.
Wedastation kriagt an Schneesensor
Da Summa steh boid ins Lånd, oba bei da Ö3 Weadastation in Grumboch is grod a zusätzliches Messgerätl installiert worn: a neicha Laser-Schneesensor! Dea wiad ob Hiabst dånn genau messn, wia fül Schnee lig. Mia wean de Datn dånn ob Hiabst auf dera Seitn a ånzoagn!
Montage van neichn Schneesensor am Windmostn am 9. Mai 2014 vo an ZAMG-Mitoarbeita.
So schauts hiazt ingesamt aus mitn Schneesensor, der wos in ana Hächn vo iba 2 m rechts von Windmostn wegsteht
De Ö3 Wedastation wiad zsamman vo da Gmoa Grumboch, vo da Region Bucklade Wöd, vo Ö3 und vo da ZAMG betriebn.