An schen foastn Pfinzdog (hochdeutsch: fetter Donnerstag – der Donnerstag zum Faschingende) winscht Eich da Huiza Luis. Lossts eich de Schnitzln und Kropfn heit guat schmeckn! Mehr iba insrei Breich gibbs do.
Hoam - 3. Seite
Sacklrutschn in Tiafnboch
Weul de Schneeloge einlodt dazu hobn de Tiafnbocha Schuachplattler a Nocht-Sacklrutschn ausgschribn. Mehr driba gibbs do.
Und Leitln, warum bin i fost imma aloanich auf da Loipn unterwegs? Nutzts doch mehr de schenan Winterspuatmeglichkeitn in insra Gegnd! 😉
Winta in da Buckladn Wöd
Wåns an Naturschnee und a Natureis gibb, dånn is insa Bucklade Wöd de schenste Wintaspuatgegnd, de ma si vuastön kån! Zum Beispü Långlaufn in Grumboch/Honeiho, Schlog, Zebarn oda in da Spratzau. Zum Beispü oba a åm Eis ban Sticklberger See in Grumboch!
Öltare Berichte dazua gibbs do:
Grumbocha Eisstockmastaschoft 2016
Letzte fleissige Vuabereitungen, damit åm 30. Dezemba ban Eis ois passt fia de legendären internationalen … ääh, fia de Grumbocha Mastaschoftn van ESV („Eisschützenverein Raika Krumbach„):
De Vareinsfunktionäre in olla Herrgottsfruah åm Werk mit hypermoderne und mit traditionölle Methodn …
10 Joah „Ö3-Wetterstation Krumbach in der Buckligen Welt“
Åm 24. Nuvemba 2006 is insa Wedastation eingweiht wuan, des san oiso hiaz scho wida 10 Joah!
Vuatrog in Kiachschlog
Åm Dunnerstog, 3. Nuvemba 2016, hoid i um 19:30 in da NMS Kiachschlog an Vuatrog ibas Weda mit Schwerpunkt aufm Hochwossa im Bereich vo Kiachschlog. Vaånstoita is da Lions Club Kiachschlog. Heazliche Einlodung! Hom se gwisst, dass de schwaste Wedakatastrophn in Östareich, vo der ma wissen, in Kiachschlog passiert is mit 42 Todesopfa?
Neiche Hochwechsel Webcam
Åm Wetterkoglerhaus åm Hochwechsel (1743 m) gibbs hiaz a supa Webcam mit Livestream! Do is da Link dazua.
Vül Regn
Nåch dem stoakn Regn vom 31. Mai föht ins hiaz neama vül auf de Joahres-Regensumman vom letztn Joahr. Des hast – ånders gsogt, dass vo Jänna bis Mai scho fåst so vül gregnt hot wia im gånzn truckanen Joah 2015 zsamm! Der letzte Stand is do zan segn: Statistik (bittschen a poar Sekundn Geduid, weul de Statistik imma neich grechnt wiad).
Hulareiduljo
Oftn (oder „aft“; hochdeutsch: „danach, nun, dann“; verwandt mit englisch „after“) muaß ma si oiso koane Suagn mehr ibas Jodln mochn. Des Jodln kå ma getrost vo da rotn Listn streichn, des stiabt net so schnö aus, des hob i hiaz neili söba dalebt, und zwoa auf da Tauplitz. Na guat, dass ma bei an Jodlkuas gnua Leit trifft, de jodln, des is net so a Ibaroschung. Oba söbst im Toi bei an Einkehrschwung in ana Hittn tuat da junge Hittnwiad do glott anjodln, dass a Freid is.
Oiso mia redn do net vo oide Wurzlseppln, de hoid grod no a poa Jodler kennan, sundern vo junge Leit, de vulla Freid an Jodla aussilossn, und net nua an! Wos gibbs a schenas ois mit oan oda mit zwa åndare de Tän schwebn z’lossn – Emotion und Lebnsfreid pur! Und in da Steiamoak gibbs imma mehran Leit de jodeln.
Des Jodn woar a bei ins in da Buckladn Wöd vua ebba hundat Joah oda so recht heifi no zan hean, wos koa Wunda is, weul insre Gegnd jo a långe Zeit zua Steiamoak ghead hod. Jedenfois san domois voa 100 Joah a gånze Hånd vui Jodla bei ins vo de Vuixmusikfuascha aufzeichnt woan, in Grumboch, Honeiho, Zebar, und a ånderswo in insra Gegnd.
Wos heit de meistn Leit ois Jodln kennan is dabei net unbedingt des, wos bei ins traditionöi gjodlt woan is. Oiso des extrem schnöle und schware Jodln, wos ma heit so ban Fernschaun vüleicht head, des woa und des is noch wia vua ehan untypisch fia insre Jodler, des woa vüleicht amoi a Bravourstickl vo an bsundas begobtn Jodlfreak, und des is dånn zu ana Kunstform woan in manche Kreise. Des hot oba dazua gfiat, dass de meistn Leit heit glaubn, dass des Jodln nua wos fia speziölle Stimmwunder is, und net fia ins Nurmalsterbliche – so a Bledsinn! Leana kån des nuamale Jodln, wias bei ins gpflogn woan is, nämli (fost) jeda, und es is a mehra in da Nachern von Ruafn und von Schrein zan findn ois wia in da Nachern von Singan.
Weas söba learna mog, dem kå i de Härtels wärmstns empföhn: http://www.tradmotion.at
Büdl: Mei Wenigkeit auf da Tauplitz ban Jodl-Schitouren-Wochnend Mitte Jänner (Foto: Ingeborg Magdalena Härtel)
A luag zruck auf de ECSS
Im „bulletin der Österreichischen Gesellschaft für Meteorologie“ is grod a luag zruck vo mia odruckt woan. Do kånnst as lesn.
Grumbocha Breich
Wea si interessiert, wos fia oide und neiche Breich s’bei ins gibb:
Do hob i a so ra Listn z’sammstöid.
Archiv
Öltere Artikln gibbs do im Archiv.