Gestern „Foasta Pfinzdog“ (hochdeutsch: fetter Donnerstag) mit Schnitzln und Gropfn, heit s‘Jägabeul in Tiafnboch, und zwischnduach muaß ma a auf insre Loipn de Festln feiern wia’s foin (solang no Schnee ligt). De Loipn in Schlog woa gestern scho a wengl grenzwertig, oba de Mühlnloipn heit is noch sehr guat gangan! Teiflisch schnöl woan olladings de Åbfoahrtn bei de festn Schneevahöltniss:
De ebenfois wundaschene Talloipe Spratzau im Bereich Liachtenegg und Hollenthon is derzeit leida net gspurt.
De meist befoahrane vo olle Loipn in insra Gegnd is wui de Mühlenloipe ån da Grenz zwischn Grumboch und Hohneiho-Gschoadt. Se is a de längste und rennt wundaschen de Bachln entlang. A Variantn, de oft nua „wüd“ spurt is, geht duachn Woid vo da Trettlermühl ins einsåm-vatramte Toi vom Spanauboch (hinta da Kothmühl eini).
Und obwui ma jo beim Loipnstüberl no in Grumboch is, foahrt ma min Auto vo mia daham doch a hoibe Stund bis zum Einstieg, jedenfois bei so herrlich wintaliche Vahöltnisse wia gestern:
A beim drittn Teul vo dera kloan Serie gibbs oiso wida oaschichtige und frisch zuagwahte Loipn, wo ma strecknweis a frische Spur in Schnee eini ziagn kånn – ideal fia olle, de a wengl oschoitn wuin vo da Oitogshektik. Wånns net grod so a Schneegestöber hot, san de Loipn nuamalerweis oba tipptopp gspurt.
Bei schen Weda wia gestern is de Loipn wui de Kinigin vo olle bei ins in da Buckladn Wöd, de Panoramaloipn in Schlog bei Zebarn:
Perfekt gespurt, oba: Wo san de Långleifa? Koane Leit weit und broat!
De schenstn Langaufloipn vo NÖ hobm ma in da Buckladn Wöd, so åbwechslungsreich sans! Zum Beispül de „Fitness- und Grenzlandloipe“ in Zebarn.
De Vahöltnisse woan heit anspruchsvoil, und es is a echtes Naturerlebnis, weul ma de ganze Rundn aloanich unterwegs is, mit kloane Ånstiege und spånnende Obfoartn:
Vüül hots heia gebn, und am 27. Nuvemba no wöche z’findn is a net normal, aba a kloa wengl woans scho mit Eis ibazogn. G’schmeckt homs no guat, a wånns sicha neama de schenstn vo dem Joah gwesn san.
Büdl: (c) Huiza Luis
De letztn Tog hob i bei da Ö3 Wedastation den neichn Schneesensor aktiviert und kalibriert. Wånn ois klåppt kenna ma nechste Wochn scho de easchtn Schneemesswerte segn.
Bei an Woidspaziergang meakt ma, dass hiaz sche langsam wida otrickat noch dera nossn Zeit vo Juli bis September. A eher truckans Platzl mog am Woidrand da Kranewitt (hochdeutsch: gemeiner Wacholder, botanisch: Juniperus communis), und so an findt ma in insara Gegend nua sötn wüld wochsn. Oba a poa schene Platzln gibbs no, so wia des do:
Da Kranewitt kånn a poa hundert Joah oid, meah ois 10 Meter hoch und sei Stamm fost an Meter stoak wern. Seine Samen brauchn 3 Joah biss‘ zeitig san und wern dånn gean zan wiazn (Wüld, Sauerkraut) hergnumman. As Huiz is wertfuil, riacht guat und is sehr witterungsbeständig.
Vo da Gmoa hea gheads auf Grumboch, vo da Pfoa her auf Gschoad (Gschaidt), vo da Post her auf Zebarn (Zöbern), vom Telöfon hea auf Honeiho (Hochneukirchen): Zebaschdoaf (Zöbersdorf)
Lång scho hob i ma’s vuagnumman, und endli bin i hiaz amoi mitn Radl noch Zebaschdoaf gfoan. Duat gibbs a Kapöln, de is goa no ned oid, und des hot an interessantn Grund:
Widmungs-Tofln in da Kapöln vo Zebaschdoaf (Büdln: Alois M. Holzer)
Des Lernfest wos vo de LEADER Regionen NÖ Süd und Bucklige Welt Wechselland in da Woath austrogn woarn is, und wos i modariern hob deafn, wor a schena Erfuig. Bsundas interessant woa da Vuatrog von erfuigreichstn östareichischn Wintaspuatla olla Zeitn: Felix Gottwald. Mehran Infos zan Lernfest gibbs do.
Büldln: (c) Barbara Maca, REVI PM
I hob ma dengt, es schodt ned amui zsamm’zstöln, wos si bei ins so im Lauf vo an Joa ån Brauch und Festln duad. Sogt’s mas bitt schen, wån wos föhlt.
Fosching
Mitn „Dirndlball“ geht in Grumboch da Fosching am Stefanitog schon recht fria los, und dånn kimb aa Beul nochn åndern.
Sülvesta wiad bei ins gfeiat wia sinst a auf da Wöd, oba insa Feiawerk bei da Halle is wui aans vo de gresstn weit und breit.
Åm Ånfång von Joah gejgnan de Fechta um (Leit vo de Vareine, de um a Spendn bittn oda Koartn fia eana Beul vakafn wuin).
Foasta Pfinzdog (da letzte Dunnerstog im Fosching): z’Mittog gibbs Schnitzln zan essn und Kropfn wean bockn.
Fosching-Samstog: fia vüle a Tog ohne Alkohol 😉
Rosnmåontog: Bauernbeul
Fosching-Dienstog: schau noch beim Fosching-Såmstog 😉
1. Miaz: Wea bei an Schmäh einifoid, is a Miazn-Keubl.
Fostnzeit und Ostern
Oschamidwoch: Oschnkreiz in da Kiachn
Oschamidwoch bis Midwoch in da Koarwochn: Brezn gibbs ban Bäck zan kafn (gånz eigane Soiz-Laugn-Brezn)
Koarfreidog und Koarsåmstog: Ratschn-Buam und -Madln san unterwegs
Ostasundog: Groan-geihn vo de Bauern, auf’d Nocht wean de Ostafeiern o’ghoazt
Ostern: de Tauf- und Firmkinda kriagn vo eanare Geijdn a (Germ-) Kipfl
Spoots Fruihjoah und Summa
Rund umman 1. Mai: Mai-Spüln vo de Musikantn bei an jedn Haus und Maistrich ziagn
Maibam-Stöln und -Umschneidn
Rund um de Summa-Sunnwend am 21. Juni: Sunnwendfeia mitn Sunnwendfeia im Museumsdoaf
A gånze Reih vo Zöltfestln gibbs, oba de ollameistn treffn si ban „Parkfest“ vo de Grumbecka Feiawerka, wos imma rund uman großn Frauentog (15. August) stodtfindt. Då kå ma si bei mindastns aan Frühschoppn des Grülhend so richtig guad schmeckn lossn (mit de Finga!).
Hiabst
Septemba: Schnidahahn
Erntedånk Ånfang Oktoba
Ollaheulign: de Tauf- und Firmkinda kriagn vo eanare Geijdn an (Germ-) Stritzl
11. Nuvemba: Martinsumzug mit de Laterndl (Kindergoatn)
Hiabstkonzert am letztn Sundog vuam Advent (Christkini-Sundog) mit Männergesangsverein, Musikverein, Gemischtem Chor und Seniorenchor Krumbach
Z’Kathrein (25. Nuvemba) gibbs dånn is letzte traditionelle Tånzfestl (Kathreintånz ban Czerwenka). Weul „Kathrein stöllt’s tånzn ein“, geht da oide Spruch. Da kloane Fosching is damit aus. Und dånn fångt de „gschlossene Zeit“ ån, oiso da Advent, der jo ruhiger sei suit.
Advent und Weihnochtn
Am Åbend von 5. Dezemba (oiso vuam Nikolo-Tog), gegnan Kramperl um, begleitn zum Teul a den Nikolo. Oda suit ma des scho ehern ois an O’kummanan Brauch einstufn?
Neich gibbs an „Event“ im Moakt mit „Perchten“ (de wos oipenländisch-traditionell eigentlich mit da Zeit vua Weihnochtn und mitn Kramperl nix z’toa hom, sundern eascht noch Weihnochtn im neichn Joah eanan Auftritt hättn).
De letztn 9 Tog vua Weihnochtn ziagn a mehra Gruppn mitn Herbergsbüldl durch di Gegnd, und stimman si so betand auf Weihnochtn ei.
Åm Heulign Obnd gibbs dånn um hoiba zehne auf’d Nocht des Turmblosn mit oanfoche Weisn vom Kiachturm owa.
Hohzatn
In insara Gegnd gibbs a oamoligs Hochzeitsbrautum mit Brautfiara, Lodn-gehn, Sprichal, Åspiarn, Schiaßa, Maschkerer, Brautstöln und Kranzl-Åtånzn und vüüüüül kloane Möhlspeis, um nur as wichtigste zan nenna.
O’kummane Breich
Pfingst-schnoizn?
Sauschädl-stöln?
Im Oita vo 19 Joahr hob i 1995 de „Wetterchronik der Buckligen Welt“ gschriebn. A PDF von da zweitn Auflog (1997) gibts do.
Do hob i a poa Sochn zan Kunstprojekt „Wetterwürfel“ z’sammtrogn:
