 |
Weda letzte Wochn |
Mit da Ö3 Wedastation is goa
Noch 20 Joah is insre Wedastation in Grumboch am End vo ihra Lebensdauer ankemman. Nachdem a neiche Station an Haufn Göd kost, iss derzeit ned geplant a neiche anzschoffn. Dafia miassad ma mindestens 30.000 Euro auftreibm, wos derzeit weda vo da öffentlichen Hand no vo Sponsoren zu erwartn is.
A kloana Rückblick: Seit 2006 hod de Ö3 Wedastation bei Hochwossa, Sturm und Schnee tausende Leit mit aktuelle Werte versorgt. I hob mi ois Betreuer drum kümmert, dass da Regenmesser oiweu putzt woan is (damit a si ned vastopft) und a sunst ois rennt, wos speziell bei da Schneemessung ned so oanfoch is. 20 Müllionen Wedawerte hod die Wedastation in de letztn 20 Joah aufzeichnt. De Statistiken von de oanzlnen Wedawerte findts noch wia fua auf dera Internetseitn do.
De oide Station wiad in de nechstn Monad otrogn wean.
-14,9 Grad letzte Nåcht
De vagångane Nåcht reiht si auf Plåtz 9 der ködastn Nächte seit 2008 ein. Im Schnid hods olle 2 Joah amoi so an Tiefstwert.
Dazua muaß ma sogn, dass insa Wedastation am Hang steht, wos oft a bissl wärma is ois wia am Toigrund. Uman Sticklberger See umadum und gen Schenau owi, is bei suiche Vahötnisse oft a weng köda.
Werbung fian Jodelkurs in Tiafnboch
www.pregnerei.at hot wieder an Jodelkurs im Programm, und zwoa am 12. Aprü:
https://www.pregnerei.at/event-details/fruhlings-jodelkurs-2025
Am besten boid ånmödn!
An schen Foastn Pfinzdog!
Heit is Foasta Pfinzdog bei ins in da Pregnerei und somit da easchte von de richtign Foschingdog.
„Foast“ hoast jo „fett“ auf Hochdeitsch, „Pfinz“ loat si vo pint, pent, πέντε [pénte] – griechisch „fünf“ – her und beziag si aufn fünftn Dog vo da Wochn (wån ma mitn Sundog zan zöhn åfångt). So ähnlich wie Pfingstn fia fufzig Dog steht.
Oiso lossts eng eichare foast bochanen Schnitzln und Kropfn guad schmeckn!
Büdl (Foto (c) Alois M. Holzer): Mei Schwägerin beim Kropfn bochn.
A bsundare Weihnochtspost – eppa a wos fia enk?
Letzte Weihnochtn hob i an wundaschen Weihnochtsgruaß mit da Post ausm Mölltoi gschickt kriagt. Eppa gfoid enk der Text a. Lests hoid amoi:
20. Dez. 2023
Lieber Alois,
noch haben wir Schnee, aber das Weihnachtstauwetter hat längst begonnen. So kann ich wenigstens noch Fenster putzen.
[Name] steht jedes Adventwochenende in Mallnitz auf dem Markt. Ich hab ihn nur einmal vertreten. Ich mag das Leuchten und Blinken und Jingle Bells Gedudle einfach nicht mehr und bin froh, wenn es bei uns hinten noch richtig finster ist, wenn der Mond „dünn“ ist und man viele Sterne sieht. Und ich liebe Vollmondnächte ohne Lichtverschmutzung. …
Von Herzen wünsche ich eine frohe und gesegnete Weihnacht! Und für das neue Jahr viel Gesundheit und Freude und so manche ruhige Stunde, um gedankenverloren in der Sonne zu sitzen, im Regen zu tanzen, durch den Schnee zu stapfen, dass der Wind dir so manche Melodie singt und dir der Blick zu den Sternen offen ist.
Alles Liebe dir und deiner Familie …
Jodelkurs und Tånzkurs
Die Pregnerei hot im November glei zwoa Angebote, nämli den fost scho traditionellen Jodelkurs, und den easchtn Franzee-Tånzkurs:
Fia den Jodelkurs kå ma si do ånmödn. Zum Tånzn kum oafoch hi – zur Stocker-Wirtin in Lemboch.
Podcast iwa Tornados
Wer si fia Zivüschutz in Östareich und fia Katastrophenforschung oder a fia Tornados interessiert, mog si vüleicht den neichn Podcast do ånhean, der zum Teu auf an Interview mit mir basiert:
DCNA Podcast Tornados Alois Holzer und Stefan Kreuzer
Wohnung frei
Wer a Mietwohnung in Grumboch im Moakt suacht, kann si des do anschauen:
Wer hot no Büdln vom 1986er Winter?
Umman 10. Februar 1986 umadum hots bei uns extrem vü gschnibn und gwaht. De Schneegwahn woan riesig hoch und a poa Tog lång is domois fost goar nix gångan in unsrer Gegnd.
Hot vülleicht no wer Büdln vo dåmois? Bsunders de gånz hochn Schneegwahn tatn mi sehr interessiern! Schicks ma bitte gern eichare Schätze auf holzer ….. …. @tornados-at
Weitere Pregnerei-Jodelkurse
Schau da bittsche den Blog und die Termine an, die auf da Pregnerei-Seitn ausgschriebn san. Do gibbs wieda a poa lässige Jodelkurse mit Wanderung in dem Joah!
Pregnerei-Blog
Ingeborg und Hermann Härtel beim Vorjodeln – Foto (c) Alois M. Holzer
Endlich Wossa
Endlich hots amoi gscheid gregnt! Am 14.4. um 12 Uhr woama mit 56,2 Liter pro Quadratmeter sogoa Nr. 1 auf da Österreich-Listn bei de 24 Stundn Regensumman. A klassisches „5b-Tief“ hoid, wos vo da Adria iwa Kroatien genau zu uns ziagg. De optimale Wedalog. Des hots leida schon lång neama gebn.
Da Bodn saugg des Wossa noch da långan Trucknheid hiaz auf wiar a Schwåmm. Deswegn is in de Bachln a ned oag vü Wossa. Des Grundwossa wiad hiaz duach den stoakn Regn endlich wida aufgfüd, und de Brunnan wean a auf da He obn hiaz wida gnua Wossa gebn.
Des is a Screenshot vo da Regenkurvn zwischn 13.4. 13:00 und 14.4. 13:00 Uhr:
Fia de aktuellen Werte geh bitte obn im Menü auf „Ö3 Wedastation“ und „Regen 24 Stunden“.
Boid iss soweit
Am 1. Aprü kimmt des Jodeln zruck in de Bucklade Wöd. Do gibbs den easchtn Jodlkurs. Åmödn kå ma si no auf da Seitn vo da Pregnerei unter www.pregnerei.at
KommPod iwa mi
Da Heller Martin aus Habich beim Huatwisch (Danksche fia di Einlådung!) hot mi fia sein Podcast interviewt. Des woa a wirklich nette Plauderei im vui lessign Pinknoise Tonstudio in Kirchschlog iwa wichtige und weniger wichtige Sochn. Wånnst amoi a Stund Zeit host zum nochilosn, dann hea da des bittsche ån:
Foto und Ton: Thomas Eitel vo „pinknoise tonstudio“ Kirchschlog. Am Büdl is links da Heller Martin zan segn und rechts bin i zan segn.
Mei neiche Zusatzquali
I hob hiaz noch ana hoibjährigen Ausbüdung a neiche Zusatzquali und deaf mi „behördlich befugter Bergwanderführer“ nennan. De Kurse hob i in da Steiamoak am Dochstoa und im Totn Gebirge gmocht – inklusive Winterkurs fias Schneeschuach-Wåndern.
Mein ersten Eisotz hob i im Jänner scho auf der Tauplitzoim ghobt mit Schneeschuach fia Kollegen vo mein Unwetter-Forschungsinstitut ESSL. Zusätzlich hoid i ob heia ois Trainer a Bergweda-Fuatbüdungen fia den Bergspuatverband in da Steiamoak ab.
In da Buckladn Wöd wiar i die Wander-Führungen im Råhmen vom Jodelkurs am 1. Aprü und am 11. Novemba iwanehmen. Åmödn fia den Jodlkurs kå ma si auf da Seitn vo da Pregnerei unter „Events und Shop“.
Neicha Jodelkurs
Da Verein „Pregnerei“ organisiert in da Buckladn Wöd im neichn Joah zwoa Jodelkurse. Åmödn kå ma si do:
Bergwetter Praxisseminar
Am 15. und 16. Oktober moch i gemeinsam mit der Bergführerin Gundula Tackner a Praxisseminar auf da Tauplitzoim in da Steiamoak fia olle, de scho immer besser iwas Weda am Berg bscheidwissen wuitn.
Und do gibbs nähere Infos auf oan oanzign Bladl zum Ausdrucken: