Kloa: Des woa nur a Aprü-Scherz … 😉
Am 2. Aprü wiad die Ö3 Wedastation vom Bauhof aufs Kirchendoch valegt. De Gmoa-Hackler wean ma dabei höfn. De Ö3 Fahne wiad iwa da Kiachtuam-Uhr ångmocht. Da Vuateul vo dem neichn Plotz wiad sei, dass de Wind- und Schnee-Messung bessare Datn liefern wiad. Freiwülige Hölfa suin si bitte bei mir möldn!
Da 17. und da 21. Miaz woan woahscheinli de weamstn Tog vua Ende Miaz vo mindestens de letztn 120 Joah. Des zagt si bei de Wedastationen vo da ZAMG, de wos scho seit longa Zeit beobåchtn tuan. Bei ins in Grumboch is am 17. a Togesmittl vo 13,6 Grad und am 21. a Togesmittl vo 13,9 Grad gmessn worn. Normal waradn suiche Temperaturen in da zweitn Mai-Hölftn.
I hob ma dengt, es schodt ned amui zsamm’zstöln, wos si bei ins so im Lauf vo an Joa ån Brauch und Festln duad. Sogt’s mas bitt schen, wån wos föhlt.
Fosching
Mitn „Dirndlball“ geht in Grumboch da Fosching am Stefanitog schon recht fria los, und dånn kimb aa Beul nochn åndern.
Sülvesta wiad bei ins gfeiat wia sinst a auf da Wöd, oba insa Feiawerk bei da Halle is wui aans vo de gresstn weit und breit.
Åm Ånfång von Joah gejgnan de Fechta um (Leit vo de Vareine, de um a Spendn bittn oda Koartn fia eana Beul vakafn wuin).
Foasta Pfinzdog (da letzte Dunnerstog im Fosching): z’Mittog gibbs Schnitzln zan essn und Kropfn wean bockn.
Fosching-Samstog: fia vüle a Tog ohne Alkohol 😉
Rosnmåontog: Bauernbeul
Fosching-Dienstog: schau noch beim Fosching-Såmstog 😉
1. Miaz: Wea bei an Schmäh einifoid, is a Miazn-Keubl.
Fostnzeit und Ostern
Oschamidwoch: Oschnkreiz in da Kiachn
Oschamidwoch bis Midwoch in da Koarwochn: Brezn gibbs ban Bäck zan kafn (gånz eigane Soiz-Laugn-Brezn)
Koarfreidog und Koarsåmstog: Ratschn-Buam und -Madln san unterwegs
Ostasundog: Groan-geihn vo de Bauern, auf’d Nocht wean de Ostafeiern o’ghoazt
Ostern: de Tauf- und Firmkinda kriagn vo eanare Geijdn a (Germ-) Kipfl
Spoots Fruihjoah und Summa
Rund umman 1. Mai: Mai-Spüln vo de Musikantn bei an jedn Haus und Maistrich ziagn
Maibam-Stöln und -Umschneidn
Rund um de Summa-Sunnwend am 21. Juni: Sunnwendfeia mitn Sunnwendfeia im Museumsdoaf
A gånze Reih vo Zöltfestln gibbs, oba de ollameistn treffn si ban „Parkfest“ vo de Grumbecka Feiawerka, wos imma rund uman großn Frauentog (15. August) stodtfindt. Då kå ma si bei mindastns aan Frühschoppn des Grülhend so richtig guad schmeckn lossn (mit de Finga!).
Hiabst
Septemba: Schnidahahn
Erntedånk Ånfang Oktoba
Ollaheulign: de Tauf- und Firmkinda kriagn vo eanare Geijdn an (Germ-) Stritzl
11. Nuvemba: Martinsumzug mit de Laterndl (Kindergoatn)
Hiabstkonzert am letztn Sundog vuam Advent (Christkini-Sundog) mit Männergesangsverein, Musikverein, Gemischtem Chor und Seniorenchor Krumbach
Z’Kathrein (25. Nuvemba) gibbs dånn is letzte traditionelle Tånzfestl (Kathreintånz ban Czerwenka). Weul „Kathrein stöllt’s tånzn ein“, geht da oide Spruch. Da kloane Fosching is damit aus. Und dånn fångt de „gschlossene Zeit“ ån, oiso da Advent, der jo ruhiger sei suit.
Advent und Weihnochtn
Am Åbend von 5. Dezemba (oiso vuam Nikolo-Tog), gegnan Kramperl um, begleitn zum Teul a den Nikolo. Oda suit ma des scho ehern ois an O’kummanan Brauch einstufn?
Neich gibbs an „Event“ im Moakt mit „Perchten“ (de wos oipenländisch-traditionell eigentlich mit da Zeit vua Weihnochtn und mitn Kramperl nix z’toa hom, sundern eascht noch Weihnochtn im neichn Joah eanan Auftritt hättn).
De letztn 9 Tog vua Weihnochtn ziagn a mehra Gruppn mitn Herbergsbüldl durch di Gegnd, und stimman si so betand auf Weihnochtn ei.
Åm Heulign Obnd gibbs dånn um hoiba zehne auf’d Nocht des Turmblosn mit oanfoche Weisn vom Kiachturm owa.
Hohzatn
In insara Gegnd gibbs a oamoligs Hochzeitsbrautum mit Brautfiara, Lodn-gehn, Sprichal, Åspiarn, Schiaßa, Maschkerer, Brautstöln und Kranzl-Åtånzn und vüüüüül kloane Möhlspeis, um nur as wichtigste zan nenna.
O’kummane Breich
Pfingst-schnoizn?
Sauschädl-stöln?
Des Beul wiad ma no länga guad in Erinnerung bleibm, definitiv mei bests vo dem Fosching: da „Jägerball“ in Tiafnboch 2014. Di Banda „Steira Gsindl“ hot mit Fidl, Quetschn, Boss und Klarinettn zinftig aufgspült beim Tiafnbecka Wiad, und des gånz ohne Strom. Ma hot si sogoa no unterhoidn kenna nejbns da Musi!!! Echt a Wåhnsinn, wos si do so ån da Grenz zwischn Grumboch und Liachtnegg ospün kå, und olle in de schenstn Gwandln. Und weuls goa so a Gaudi woa zu später Stund, gibbs do hiaz ka Büdl dazua. Ban näxtn moi oanfoch sölba dabei sein!
Do schau her, des gfreit mi oba: In da Moaktstroßn im Oatszentrum traut si wea iba a neichs Gscheftl driba: Angel-Shop „Petri Heil“.
Wa schen, wånns mera „Unternehmungs“-lustige in da Moaktstroßn mit guade Ideen und da richtigen Umsetzung gawat!
Wiari grod dafoahn hob, is åm 28. Februar Eröffnung (siagst ban Kommentar untn).
| Do geht’s zu de neichastn Weda-Datn vo da „Ö3-Wetterstation Krumbach in der Buckligen Welt“. De Wedastation wiad in Zusammenarbeit vo Ö3 bzw. ORF, ZAMG (Hoche Wartn), Moaktgemeinde Grumboch und „Gemeinsame Region Bucklige Welt“ betriebn. De Seitn do wiad im Auftrag vo da Moaktgemeinde Grumboch erstöd um interessiertn Bürgerinnen und Bürgern an oanfochn Zugriff auf olle vafügboan Wedainfos zu ermöglichn. De unentgötliche Betreuung vo da Wedastation beim Bauhof vo da Gmoa erfuigt durchn Huiza Luis. De Wedadatn diafn vo jeden frei fia private Zwecke verwendt werden. Bei kommerzieller oder wissenschoftlicher Verwendung is neben der Quellenangabe a Nochricht an den Betreuer und a Belegexemplar erfuaderlich. |
